ክታብ - መዐደዩት - ፈድል ጥርሶ
ፈድል ጥርሶ ሸሞንዲ ዕቅባሚካኤል
ዲብ ተበት ባይራ ሻፋም ዐልነ። ውቃው እዝ እግል ደውሸሾት ንጠባጠብ እት ህሌነ፡ ወድ ባህተ - ቃእድ ስርየት - ምን እሲቼ ለትለአከት ርሳለት ሀቤኒ ወቀርአኩወ። ወለት ክምሰል ወልደት ወፍትሒ ክምሰል ሰሜተ፡ አስቴር ወለትናመ ዲብ ቤት ምህሮ ሰውረት ሰኒ ክምሰል ህሌት ሸርሐት እዬ። ለክቱብ ናይ ብሸራት መንመ ዐለ፡ ሸበህ ላኪን ዝን አበሌኒ። ሰበቡ ዓይለቼ ምን ዐድ ክምሰል አምጸአወ፡ እግል እሲቼ ዲብ መዐስከር ሸዐብ ወእግል ወለቼ ዲብ መድረሰት ሰውረት አበጸሐን እት ህሌኮ፡ ክምሰል እሊ ዐፍሽ ትሰልም ለህሌከ፡ እብ ብጣርዬቱ መዐሰላመ ለእቤለን። ክምሰል ትፈንቴኮ ምኖም ካልኣይ ዶል እግል እብጸሖም በክት ኢረከብኮ። ዔጻቼ እንዴ ሀብኩወን አስክ መውገፍ ክምሰል አቅበልኮ፡ መኪነት እንዴ ጸበጥኮ ተዐሊም ለልእቱ አንፋር ሐዳይስ እግል አብጽሕ አስክ አራግ ጊስኮ። ሐቆሁ ህዬ ለጀብሀት ሸዕብየት ተአሰንየን ለዐለት መካይን ወያኔ አስክ ገዳረፍ እግል ነብጽሕ እሎም አስክ ብዕድ ሰፈር ትበገስኮ። ዲብ ግርማይከ ክምሰል በጽሐኮ ላኪን “ካድር እግል ትድረስ አቅብል” ሰበት ትበሀልኮ፡ መኪነት እግል ብዕድ ሙናድል እንዴ ሰለምኩወ አስክ መድረሰት ካድር ጊስኮ።
አነ ዲብ 18ይት ደውረት ካድርቱ ለሻረክኮ። ምናተ፡ ስቱር ወራር መታክል ሰበት ከልቀ ሐቆ ናይ አርበዕ አምዕል ምህሮ፡ በርናምጅ እንዴ ትካረመ ክሊነ አስክ ድፈዕ ትበገስነ። ምስለ እተ ወክድ ለሀይ ተድሪብ እንዴ አትመመው ዲብ ዴሽ ለትወዘዐው ሽባን እንዴ ትሓበርነ ክልኤ ስርየት ከወነ። ሐቴ ምስል ብርጌድ 44 ወለ ካልኣይት አነ ለዐልኮ እተ ህዬ ምስል ብርጌድ አርበዕ እብ ጀሀት ድማን ብርጌድ 44 ናይ ጀብሀት ቅብለት ምፍጋር ጸሓይ ሳሕል ሸፈፍነ።
ወድ ባህተ፡ “አሀ ብሸራት ሰኔት ትበሸርከ ማሚ?” ቤሌኒ።
“አዜ ሚ እግል ትንፈዐኒ ብሸራት። አሰልፍ ቴለል ድሌ ብህልዬ ምን ተዐሌ ብዲር እንዴ በጽሐኮ ወአቅበልኮ ዐልኮ፡” እቤሉ። እግል ዕርፍ በክት ክምሰል ይዐለ ዲብ አምር ቱ።
“ከአዜ አፎ ይእነደአከ?” ዲብ ልሰሐቅ።
“ለኢገብእ!” እግል ልተልሄ ክምሰል ቤለየ ኣምር ምንመ ዐልኮ፡ እብ አማን ምንገብእ መዳሊት እግል ህጁም ዲብለ ዐልነ እቱ ወክድ፡ “ጊስ ጼዋከ ጋንሕ!” ምን ልብለኒ ወኢትከበትኩዉ።
“ዲበ ሐልፋመ ለኢገብእ ገብአ እትኢኮን፡ ኢለአስትህለከ መአዜ ገብአ መለሀይ!” ዲብ ልብል በልሰ እዬ። አምበቶት ህጁም ትየመመ። ስርየትነ ምስል ክልኤ ስርየት ብርጌድ አርበዕ ወብርጌድ 23 እግለ አግደ መርከዝ እዳረት ወለዲብ ቀበት አውጌት ለዐለ 76 ለልትበሀል ስለሕ አባይ እግል ራቀቦት ትበገስነ። እብ ጀሀት ምፍጋር ጸሓይ እንዴ ትጠዌነ ህዬ፡ ሐቆ ናይ ስስ ሳዐት ሄራር ዲብ ሕምብረ አባይ ትለወሽነ። አሰልፍ ስለለ ቱዩናሙ ሰበት ዐለው፡ እግለ ጅወ ለአተ ዴሽ እንዴ መርሐው እብ ገበይ ናግየት ዲብለ ኣማሙ ለዐልነ ሀደፍነ አብጸሐውነ። ለመርሔነ ነፈር ስለለ ለኢታከዩ እተ ላሊ ለሀ ለአተ ዴሽ ምንመ ሳድፈዩ ሐነ ላቱ አተላሌነ። በላይኔሽ ወቃእድ መጅሙዐት ወድ ወልደኣብ ምን ስርየት አንፋር ካድር እስትሽጅሃድ ምንመ ትፈንተዉነ፡ ምን ሀደፍነ ግረ ላተ ይአቅበልነ። አባይ አስክ ቅሮረ ገጹ ክምሰል ለሀርብ እንዴ ወዴነ አቴነ እቱ። ህጁም አምበተ፡ መዐስከር አውጌትመ ህዬ ትጸበጠ።
ዲብለ መዐስከር ለትሸቀ አብያት አባይ ክምሰልሁመ ዲብለ ምድር እብ ከባሲል መዳፍዕ ለትሸቀ አግቡይ ወከሪጠት አቶብየ ለሸርሕ መባትክ ዐለ እቱ። ምናተ ለመዐደኒታት እብ ተማሙ እብ ቀናብል ወርሳስ ሰበት ነደ፡ ዲብ ምድር ለትከዐ ቅጡጥ እግል ትርኤ እቱ ለቀድር፡አስክ ክሉ ለድዋራት አደሐ ጸዐደ ገብአ።
ቴለል ክእነ እት እንቱ ለምን ቀደም እብ ጀሀት ድፈዕ ለትበገሰው፡ ድፈዕ አባይ እንዴ ሰብረው ከርስ ምስልነ እግል ልትሓበሮ ለታኬናሆም ውሕዳት ዴሽ ሸዕቢ አደገው። ክርን ዴሽነ ልግበእ ወደባባትነ እግል ንስመዕ ዲብ ነአተናሴ፡ ጼነ ማይ ገብአ። ወቅት ዲብ ረይም ወምድር ዲብ ጸብሕ እንዴ ጌሰ እስቡሕ ሳዐት አርበዕ ተለው ትቤ። መስኡሊነ ቴለል ክምሰል ኢተዓፈ ሰበት ጌመመው፡ እግል ክልኤ ምነ 76 አው ቢ10 ለልትበሀል ስለሕ ለልስሕበ ለትጸበጠየ መካይን አባይ ለክልኤ ሴፈ ወለሳልሳይት ህዬ ሙጀርሒን ጸዐናሀን። እግልዬ ወብዕዳም መቅደረት ስዋገት ለዐለት እግልነ ህዬ፡ ክምሰል ከረ ደሰይ፡ ሽሂድ ሰለሙን ዐወር ወወድ አፈወርቂ እበ አቴነ እቡ እትጀህ እት እንሰውገን እግል ነአፍግረን አማውር ተሀየቤነ።
ዲብ ክእነ ቴለል፡ ለአስክ ቅሮረ ገጹ እግል ልትፈንጠር ለተሐሰበ ዴሽ አባይ እብ ቃብሉ እግለ ናይ ነድ ብርሃን እንዴ ትነፈዐ፡ ዲብለ መዐስከር ለአቴነ ብዝሔ ሙናድሊን ሰበት ጌመመ፡ እባሁ እንዴ ኢለአድግ ለገጽ ቀደም አስክ ድፈዕ አባይ ለዐቅብ ለዐለ ጄሹ ሰሩ ግረ አስክለ ዐልነ እቱ ድዋራት እንዴ ሰሐበዩ፡ ክሉ ስልሑ አስክነ ወጀሀዩ።
ምነ እግለ ኦራላት እግል ንሰውግ ለትየመምነ ሙናድሊን አነ ሌጣቱ መቶር እንዴ ሀረስኮ እግል እፍገር ለጀረብኮ። ደሰይ ወሰለሙን ላኪን ህጁም ድቁብ
ክምሰል አምበተ ለመካይን እንዴ ሐድገው እብ እገሮም ዲብ ለሀርቦ እብ ዎሮት ወደግ ፈግረው። አነ ላኪን እምበለ ስስ ለጸዐንኩዎም ሙጀርሒን አድሐኖት ብዕድ ሕርያን ይዐለ እግልዬ። ምናተ፡ እግል እፍገር ሐቆለ ጀረብኮ እንዴ ይእረይም ጎማታት ናይለ መኪነት እብ ርሳስ አባይ ሰበት ትዘበጠ ዲብ ምድር ጀገሕ ቤለ። አናመ ዲብ ቅርድ እዝንዬ እብ ርሳስ እንዴ ትዘበጥኮ ምነ ጻብጡ ለዐልኮ ስቴርሶ ዲብ ምድር ወደቅኮ።
ምነ ጽዕኖም ለዐልኮ ሙጀርሒን ሰልጠኔ እንዴ ነጥረ ለሀርብ እት ህለ፡ አረፋይነ (ሐኪም ስርየት) ወዘነት - ምን ፍርቀት ዓዳት ተንዚም - ተኸስተ ክፍለ ወክልኦት ብዕዳም አስማዮም ለይእዘከር ዲብ እዴ አባይ በርደው። ምናተ፡ አባይ እተ ዶሎም ቀትለዮም። አነ ለሙትኮ ሰበት መስለዮም እንዴ ሐደገውኒ ሐልፈውኒ። ለዲብ ረአስ መኪነት ለዐለው ጅማዐት፡ እንዴ ቀትለው ዲብ ምድር ክምሰል ለከፈዎም ዲብ ረአሼ ትከመረው።
ዲብ ቅያብ ሰበት ዐልኮ፡ ለሐሬ ጀረ ተጠውራት ኢደሌኩዉ፡ ዶልዶል ዲብ ምግብ ምነ ቅያብ ሽውየ ሐሶሴከ፡ “ሚ ጋብእ ህሌኮ? አውጌት ሙሽ ጻብጣመ ህሌነ?” ለልብል ሰኣላት በሊስ እንዴ ይረክብ እሉ ህዬ ምን ሐዲስ እተ ቅያብዬ አቀብል።
ምድር እብ ጸሓይ እንዴ ሐፍነት ዲብ መቅሎ ትበደለት። አነ ህዬ ሓለቼ እግል እፍሀመ ሰበት ኢቀደርኮ ድዋራቼ እግል ኣምር ወሕሰስ ትጻገምኮ። ምናተ፡ ዕንታቼ እግል ክሉ ሽእ ሕብር አክደር እንዴ ገብአ ትረኤኒ። ለዲብ ባካቼ ዋድቃም ዐለው ሹሀደእ እግል አሌሌ እብ እደዬ ረዋሰስኩዎም። አርእስቶም እስእኖታቶም ሙናድሊን ክምቶም ሸክ ኢወዴኮ። ዲብ እሽሕግ እግል እትሐረክ አምበትኮ። እብ ከም ሓይል-ማይል እት ሐንቴ ዎሮት ረአሼ ሌጠ እግል ለዓዝል እዬ ለቀድር ቅራር ትጸገዐኮ። ጸሓይ ዲብ ትደሀር አክለ ጌሰት ላኪን፡ ለዕዛል ዲብ ፈዬሕ እግል ክሉ ገሮብዬ ዲብ ገልብብ እዬ ጌሰ።
መዛብጬ ዲብ እዝንዬ ሰበት ዐለት ክርን እግል እስመዕ እቀድር ይዐልኮ። ለትትረኤ ሐረከትመ ይዐለት። ምድር ክምሰል መሰ ምነ ወዐልኮ እተ አካን እብ አርበዕ እገርዬ ተሐረክኮ። ጽንሕ እንዴ እቤ ህዬ ዲብ አርዐዴ እብ ብጣርዬ እግል አሳድር ጀረብኮ። እለ ሐረከት እለ እንዴ ትዘበጥኮ ምን እወድቅ ዲብ ሳልስ ምዕልዬ ተ ለዐለት። ምናተ፡ እግል አሳድር ክምሰል አምበትኮ እንዴ ይእትሳረሕ አባይ ረኤኒ።
አሰልፍ እበ ለዐቅቦ ለዐለው ዐሳክር ትጸበጥኮ። ልትሰአሉኒ ዲብ ህለው ዲብ ባካት አካነት ዋርድየት ሰበት ዐልኮ፡ ለዋርድየት ሰበት ኢራቀበ ደንቀጸ፡ ሳልፋይ ለቀርበ እቼ ሰኣል፡ “እብ አየ መጽአከ?” ልብል ዐለ። እብ ሰበብለ ዝብጥት
ለዐለት እዝንዬ ለትደብአት እዝንዬ ለሕያይት ሽውየ እግል ትትከሰት እዬ ሰበት አምበተት፡ ለቀርበ እቼ ሰኣል ክሉ ሰምዐኩዎ። ለመጽአኮ ምኑ ድዋራት እግል ሐብር ህዬ አስክ ደፈዕነ አሸርኮ እሎም። ለለዐቅብ ዐለ ዐስከሪመ እብ ሰበቼ ሰኣል ቀርበ እቱ። ህቱመ እንዴ ፈርሀ ራቅበኒ ለዐለ እግል ልትመሰል ምስለ አነ ለሀብክዉ በሊስ ለትትመሳኔ ሐብሬ ሀበ።
ለአማን ላኪን፡ አነ ወጅማዐቼ ለወደቅነ እተ አካን ቀበት መዐስከር አባይ ተ ለዐለት። እብ አምሐርኛ ሰበት በለስኮ እግሎም ህዬ፡
“ዲብ እሱወ ክፈል ሃገር ትነብር ዐልከ?” ቤሌኒ።
“አዲስ አበበ።” “ዬት ቦተ” “ፓፕራለ።”
ሐቆ እሊ “ሞታለቃ” እንዴ ቤለው ትላከው። ክምሰል በልሰ እቶም፡ “የሰፈርህ ሰው መጣ፡” ቤለው። ሞተለቀ፡ “ጋሻይ ምን ዐድከ ማጽእ ህለ፡” ክምሰል ሰምዐ ድንጉጽ ዲብ እንቱ ዲብለ ዐልኮ እተ አካን መጽአ። ክልኢትነ ሕድ ገነሐነ። አነ ኢቀዌኩዉ! ‘ሞታለቃ!’ ኣይታንቲ (ሙሳዕድ) ዲብ አነ ፈሓም ለሐድር እዬ ለዐለ ነፈር ዐለ። ኣምሩ ሰበት ዐልኮ ህዬ፡ “ጥርሶ ኣይደለም እንዴ?” (አራግ እንተ ማሚ?” ዲብ እብል ትሰአልኩዉ። ሞታለቃ፡ ለአራግ አንያቡ እብ አንያብ ደሀብ እንዴ በደለዩ፡ ኢከም በዲር አዜ እንዴ ገረመ ወሰነ ጸንሔኒ።
“አይወ፡ አናቱ፡” በልሰ ዲብ ልትፈከር። እብ ሸፋግ እግል ለአሌሌኒ ላኪን ኢቀድረ። ሰበቡ ህዬ እት ረአስለ ሸበህ ጅንዲ እመስሉ ለዐልኮ፡ ገጬ ወልባሼ እብ ደም ሕንጉር ሰበት ዐለ። ምሽክለቱ ሰበት ፈሀምኩወ ኖሼ አትፋቀድኩዉ። ለሞታለቀ ዝያድ መስኢቼ ረድ ፍዕል ሀቤኒ። ገሮብዬ እንዴ ሐጽበ እዬ፡ ነዲፍ ልባስ ዐስከሪ አልበሴኒ ከሰፌኒ። ገሮብዬ ማይ እንዴ አክለሰ ናሽፍ ሰበት ዐለ፡ ለሞታለቀ ሀቤኒቱ ክልኦት ኮዝ ሻሂ ጁብብ እቤሉ። ነብራመ በልዐኮ። ክልኤ አምዕል ወላሊ ሰበት ዓረፍኮመ ርሕ በለስኮ።
ለሞታለቀ ምስልዬ እንዴ ጌሰ ዲብ ጀነራል ሑሴን ቀርበ። “እሊ ሑዬቱ፡ እብ ምራዱ ዲብ አብዮታዊ ሰራዊት ስሉም ህለ፡” ቤለዩ። ጀነራል ሑሴን፡ እብ ፋርሕ ገጽ ወናይረት ከብቴ ትከብቴኒ። ሞታለቃ፡ “አስመረ ክምሰል በጽሐከ ዲብ ፖስት ።ፊስ ኣትዩ” እንዴ ቤለ አስክ ዋልዴኑ ጀዋብ እንዴ ሀበ ሳረሔኒ።
መብነ ጀነራል ሑሴን፡ ኢክምሰለ እብ ዕሸሽ ለትሸቀ መዐሳክር፡ ፍንቲት ግርመት
ዐለት እሉ። ከርሱ ክምሰል አቴኮ ህዬ፡ ብናሁ፡ በለፎኑ ለዲቡ ህለ ዐፍሽ ክምሰል ረኤኮ ዲብ መባኒ አስመረ ለህሌኮ መስለ እቼ። ጀነራል፡ ስጃረት እግል ልስሐብ ዕልበት ክምሰል አፍገረ ቀደሙ እግልዬ መጠ። አናመ “ክምሰል ውሉፍ አነ ከፎ ኣመሬኒ?” ዲብ እብል እብ ከብጄ ሐመድኩዉ።
“ናይ ሚዶል ምናድል እንተ?” ናይ ሰልፍ ሰኣል ለአቀርብ እቼ ዲብ ህለ፡ ክምሰል ደአልቱ ለለክፈየ እቼ፡ አናመ እግል ህጅክ ልትሰአለኒ ለህለ መስለ እቼ።
“ናይ1980”
“እብ እሱወ ገበይ ተሓበርከ እቶም?”
“እብ ሱዳን…፡ ዐፍሽ እንዴ ጸዐንኮ ሙናድሊን ዲበ ዐለው እተ አካን ክምሰል በጽሐኮ እግል አቅብል በክት ኢረከብኮ።”
ጀነራል፡ ማይ ወሻሂ ኖሱ ኖሱ ሀቤኒ። እንዴ አትለ፡ ተለፎን እግል ለአተስል ምን ባካቼ ርይም ቤለ። አነ ህዬ ለዲብ ረአስለ ቀደምነ ለዐለት ጠውለት ምስል ብነ ላጥአት ለዐለት ከሪጠት ዐስከርየት አቅመትኮ። ድፈዓት ሙናድሊን ወዴሽ አባይ ክምሰልሁመ አስማይ ወመካሪት ምድር ድጌ ሰውረት እብ ተፋሲል ወዋድሕ ዲብ አቀምት ገንሐክዉ። “አባይ አክል እሊ ለአምረነ ዐለ!?” ለልብል ጌማም ሰበት ይዐለ እዬ ሰኒ ትፈክረኮ። አሰር መካይን እብ ጥያራት አባይ እግል ኢልትከሸፍ አቅሹን ዲብ እንስሕብ እት ነአትመሳስል ለሓለፍናሁ ወቅት፡ ፍገሪት ንኢሽ ክምሰል ዐለት እሉ ሌጠ ጌመምኮ። ዲብ ለአምሩነ ወቅት ልታከው እግልነ ዐለው እት ኢኮን ለተሐበዐ ምስጢር ጀብሀት ሸዕብየት ሰኒ ወአማን ክም ለአሙሩ የቀንኮ። ዲብለ ምስል ጀነራል ለጸንሐኩወን ክልኤ አምዕል፡ ዲብ ናይ ንዳል ሐያቼ ርኢሁ ለይአምር ነብረ ወዕርፍ ረከብኮ እተን። ጀነራል ሑሴን ዲብ ቀበት እለን ክልኤ ምዕል ሰለስ ዶል እንዴ ትላከ ትሰአሌኒ።
“ጀርቤ ሸዕብየት ሚ ዐለ ሀደፉ?” “ዴሽኩም እግል ልደውሽሽ”
“ሸዕብየት፡ ምስል ክሉ እሊ ለረኤካሁ ስለሕ ወጥያራት ዲብ ብነ እግል ትደውሽሸነ ለትበገሰት ሚ ሰበት አምነት ቱ?”
“ምን ዴሽኩም ለሰልበቱ ስለሕ ሰበት ደምነት፡” “ሴፈ ህዬ ምን አየ ትረክብ?”
“ምን ዴሽኩም”
ጀነራል ምን ሰኣላት እንዴ አዝመ መደት አስተንተነ ወአቅመቴኒ።
“ከ…ምስል ውጩ አትዋጀሀከ?” ቤሌኒ። ውጩ ቃእድ ብርጌድነነ ዐለ። አሰልፍ ገጽ እት ገጽ አግል አትዋጀሀከ ለቤሌኒ ሰበት መስለ እቼ፡ ድንጉጽ ዲብ አነ አቅመትክዉ። እብ ሬድዮ ክምቱ ክምሰል ፈሀምኮ ላተ፡
“ተረግ እንዴ አበልክዉ ለመጽአኮ ውጩ ሚ ፋእደት እግል እርከብ ምኑ?” ዲብ እብል በለስኮ እሉ። ጀነራል ሑሴን ሰሐቀ እቼ። እንዴ አትለ ስጃረት እግል ልወልዕ ዲብ ልትዳሌ፡
“ናይ ምዶል ምናድል እንተ?” እንዴ ቤለ ትሰአሌኒ። “አማኑቱ ወለ በዲር እቤሉተ ትረሰዐዩ?” ዲብ እብል ትፈከርኮ።
“ናይ 1980፡”
“ደሐን… ከረ ተኽላይ ዐደንመ ለአምረኩም ኢኮን። ህቱ እግል ለአክድ እግልናቱ፡” ቤሌኒ። ጀነራል፡ አስክለ ወክድ ለሀይ ምንዬ ሐብሬ እግል ልርከብ ሕስር ዛይድ ለዐለ እሉ ኢመስለ እቼ። እብ እህትማም ሕጡጬ ክምሰል ህለ ላኪን እብለ ሓርያይት ህግያሁ ኣመርኮ። “ተኽላይ ዐደን” ክምሰል ቤለ ምን በረ ለኢትትረኤ ፈርሀት በአተኒ።
አነ ዲብ ፈብራይር 1975 ቱ ዲብ ጀብሀት ሸዕብየት ለፈገርኮ። ዲብለ መደት ለሀ እንዴ ሀዴኮ አብ ዎሮት ጅነ ባጽሕ ዐልኮ። ሰዋግ ሰበት ዐልኮመ ደሐን መናበረት ዐለት እዬ። ዲብ ሰልፍ 1975 ዲብ አስመረ ምስል ንዕዮ ሽባን ኤረትርየ እብ ዐሳክር ደርግ ላኪን ሽቅልዬ አትካረምኮ።
አምዕል ሐቴ፡ ዲብ ሰንበል ለዐለት ሐልቼ እንዴ ረኤኮ አስክ ካምቦቦሎ ዲብ አቀብል፡ ጦር ሰራዊት ምን መካይኖም እንዴ ትከረው ዲብ ምድር ትፈንጠረው። “ቁም!” ህዬ ቤለውኒ። ዲብ መትጸበሪ አተቡስ ክምሰል በጽሐኮ። “ብጥር” እት ልብሎኒ አቶቡስ ሐረጎት እት ቀደምዬ እንዴ በጥረት ባበ ዲብ ከስት ሐቴ ገብአ። ለወክድ ምነ ብቆት ክምሰል ነጄኮ ፈጅራተ እስቡሕ አስመረ ዔጻቼ እንዴ ሀብኩወ አስክ ዐድነ - አውልዕ ጾሩ አቴኮ። አስክ ዓለ እንዴ ትከሬኮ ህዬ አስክ ቅዋት አሸዕብየት ተሓበርኮ። ዲብ ብሌቃት እንዴ ትደረብኮ ዲብ ቦጦሎኒ ሴዕ ትወዘዐኮ።
ተኽላይ ዐደን ዲብ ቦጦሎኒ ሴዕ ኮሚሽኔር ስርየት ዲብ እንቱ፡ ንትኣመር ዐልነ። ነፈር ናይለ እብ ቃእድ ስርየት ‘ሀንደበት’ ወእብ ኮሚሳር ስርየት
ፊልጶስ ትትመረሕ ለዐለት ናይለ ቦጦሎኒ ውሕደት ሰበት ዐልኮ፡ ተኽላይ ዐደን ክምሰለ እግል ጀነራል ሑሰን ለሐበርኩዎ፡ ክምሰል ይዐለ እግል ልፈደሐኒቱ። እብ ምራጄ ዲብ አባይ ሰለምኮ ማ ኢፋል እግል ልቀይም ቀድር ዐለ። ሰበት እሊ ጀነራል ምስሉ እግል ለአትዋጀነ ክምቱ ክምሰል ሐበሬኒ ገሮብዬ ሰከክሕ ገብአ። “አይዋ….!ገሬ ምን እንተ ከጀነራል ማይ ወስጃረት እግል ልትለአክ እግልከ!” እቤ እብ ከብጄ።
ምነ መክተብለ ቅያደት ፈገርኮ። ጀነራል፡ “እሊ ነፈር እሊ እብ ምራዱ ለሰለመ ኢኮን እብ መትደጋግ ጽቦጡ!” እንዴ ቤለ እግለ ዙባጥ እብ መደጋግ እግል ልጸብጡኒ አዘዘዮም። ህቶም ህዬ አስክለ አሲሪን ሙናድሊን ወዶ-ገበ ለነብሮ እተ አካን ነስአውኒ።
ዲብለ አካን፡ 15 ሙናድላት ብርጌድ 23 ጸንሐያኒ። መብዘሐን ዲብ እገረን ለተሓከረየ አዋልድ ተን ለዐለየ። ልባሰን እብ ደም እንዴ ትሐጸበ ወእብ ዕሳስ እንዴ ትሼሸ ጭገረን ንፉሽ እት እንቱ እብ ወጀዕ ጠረዐ ዐለየ። ኖስነ- ለዲብ ሰፍ ወዶ-ገበ ለትጸበጥነ ሙናድሊን ለዐልነ፡ እግል ክለን ሐጸብናሀን ወጸልዐን ሰፈፍነ እለን። ምናተ፡ ለነዳፈት እግል ለአዳውራሀ በክት ኢረከበየ። ዲብ ሐቴ ዚል እንዴ ጸዐነው አስክ ዎሮት ወደጋይ ጨቢብ እንዴ ነስአወን ዲቡ ሬሸነወን። እለን ለቀትለ ዘብጥ ክምሰል ሰምዐነ ለዲብ ድዋራትነ ዐለው ዐሳክር፡
“23ኛ ብርጌድ፡ እንኳን መረሸን ከታቻለ ስጋውን መብላት አልበት!” (ብርጌድ 23፡ ኢኮን ሬሸኖት ስጋሀ እንዴ ኢተርፍ እግል ልትበለዕ ቡ) እት ልብሎ ሰመዐናሆም። ለወክድ ለሀይ ለትሰመዔኒ ወጀዕ…!
ለሙናድላት ሐቆለ ትሬሸነየ፡ ሕናመ ዲበ ዚላት እንዴ ትጸዐንነ አስክ ማርሰ ተክላይ ግስነ። ዲቡ ሴፈ ዴሽ ለትጎርት መርከብ ጽግዕት ሰበት ጸንሐተነ፡ ዲበ እንዴ ትጸዐንነ ባጽዕ አቴነ። ዲብ ዎሮት ሮሻን ክምሰል ዓረፍነ ዎሮት ዛብጥ መጽኤነ።
“እሱዉቱ ለአሲር?” ትሰአለ። እግል ዶሉ በሊስ ኢረክበ። ሕድ እት ነቀምት ትም እምቤ። ድንጋጬ እት ቀበቼ እንዴ ዐቀርኮ መልሂቼ እግል እምሰል ጀሀድኮ። ዲብ አውጌት ምን ሬሸኖት ክምሰል ተረፍኮ፡ ሽውየ እስትሩሕ ዐልኮ። እተ መደት ላኪን አማውር ሑሴን አሕመድ ዲብ አካኑ ክምሰል ዐለ ፈሀምኮ።
ለዲብ ማርሰ ተክላይ ለትሰለሜነ ዐስከሪ፡ መጦረለ ልትሰአል ለዐለ ዛብጥ እንዴ ቀርበ እግል ልፈናቴነ ክምሰል አምበተ፡ “እሊቱ ሐቆለ ሐርብ ለተሓበረ እትነ፡” ዲብ ልብል ዎሮት ምነ ወዶ-ገበ አስክዬ አሸረ። ሐቆ እሊ፡ ምስለ ስጅል ዲብ ለአትመጣውሮ ክልኢቶም እንዴ አንተብሀው አቅመተውኒ። ዲብ ባጽዕ እንዴ
ይእትመዬ ወይእውዕል፡ ዲብ መኪነት ድብእት እንዴ ጸዐነውኒ አስክ ቃኘው
- አስመረ ነስአውኒ። ዲብ መመርምራይመ ቀረብኮ። ዱሉይ ሰበት ዐልኮ ላኪን እግለ ቀርበ እቼ ሰኣላት በለስኮ እቱ። ኖሼ እት ጦር ሰራዊት ክምሰል ሰለምኮ እስባት እግል ሀብ ክምሰልት ተሐበርኮ ለዲብ መሕፉደት ጥርሶ ለትከተበ ዕንዋን ትነፈዐኮ እቡ። “ምዶል? እተየ? እብ ከፎ? ምን ትከበቴከ?... ለልብል ሰኣላት እብ ዋድሕ ሐቆለ ሀብኩው ለመመርምራይ ሽውየ ሐስበ። ግራዬ ጅማዐትነ ምን ሐዲስ ዲብ አውጌት ህጁም እንዴ ጠለቀው ውቃው እዝ ሰበት ደውሸሸ፡ ምነ ጀብሀት ለትፈንጠረው ዐሳክር ለወክድ ዲብ ቃኘው ማጽኣም ዐለው። መመርምራይ እግለ አቅረብኩዉ ደሊል እግል ለአትመጣውር ሰበት ቤለ ህዬ፡
“ምን ዴሽነ ክእነ እብ ዋድሕ ለዐለ እተ አካን እግል ለስእል ለቀድር ይህለ። አማኑ እግል ልግበእ ቡ እሊ ሕጻን” ቤለ ወምስለ ዲብ እስለሕ ለትነደአው ወዶ-ገባ እንዴ ሓበረ አስክ ወንጂ - ባካት ላጌቶ - ነድኤኒ።
ረሸኖት ወኣቲ ሐብስ ሰምበል ክልኦት ዐባዪ መታክል ሰበት ተዐዴኮ ሽውየ ምንመ አስተረሐኮ፡ ተኽላይ ዐደን እግል ኢልርከበኒ ላተ ሰኒ ፈርሀኮ። ህቱ፡ ፋይልዬ ወለ ህቱ ለልአምሩ ተእሪክዬ እንዴ አትመጣወረው ክምሰል ቀሸሽኮ እግል ልፈደሐኒ ቀድር ዐለ። እብ ናዩ ሰበብ ምን ሐዲስ እት መርመረ እግል ይእቅረብ ትሻቀልኮ።
ለናይ አትፋዘዖት አምዔላት፡ ክልኤ አምዕል እት ሳምን፡ አተሉት ወከሚሽ ዐለየ። ዲበ ሳልፋይት አምዕል ዲብ እፈርህ ሻረኮ። ክል ወዶ-ገበ ዲብለ እጅትመዕ ድድ ሸዕብየት እቢሁ፡ ወተእዪዱ እግል ሕኩመት እግል ልሽረሕ ዐለ እሉ። ክሉ እብጣሩ እንዴ ገብኣቱ ልትሃጌ ለዐለ። ለሸሬሕ ክምሰል አትሐዘዮቱ እንዴ ትወሰቀ ዲብ ወሳእል እዕላም ህዬ ልትነሸር። ዲበ እጅትመዕ መሻረከትከ ድህርት ዶል ትገብእ ህዬ ዲብ ሸክ ተአቴ። እብ ተውሳክ ከረ ተኽላይ ዐደን ዝያደት ክሉ ሰበት ታቡዑከ፡ አባይ ለቴለል ክምሰል መንፌት ቱ ለልትነፈዕ እቡ ለዐለ።
ተኽላይ ዐደን ልግበእ ወተኪኤ ቀሺ ዲበ ናይ ሰልፍ አምዕል ኢመጽአው። ለናይ እዳረት በርናምጅመ እበ እተ አምዕል ለሀ ለተሃገው ተመ። ዲብለ ተሌት አምዕል ህዬ አስክ መዲነት ለእንፈግር እበ ብጣቀት እት መጅሙዐትነ ሰበት ተሀየበት ኢፈርሀኮ። ምሴ፡ “ምህሮ ከአፎ ወዐለ?” እንዴ እቤ ክምሰል ትሰአልኮ፡ “ወድ ቀሺ ማጽእ ዐለ…” ለልብል በሊስ ረከብኮ። ምን እሊ ወክድ እሊ ወሐር ዲበ በርናምጅ እግል ይእሻርክ ለትፈናተ መሰምስ እግል እባስር አምበትኮ። እግል ሐቴ ለእትጀወል እበ ብጣቀት ተስሬሕ እብ ክልኦት ብር
ዲብ እትዛቤ ምነ ጅማዐቼ እንዴ አካከብኮ ዲብ ወክድ ምህሮ አስክ መዲነት ዲብ እፈግር፡ ዲብለ ናይ አትፋዘዖት በርናምጅ እንዴ ይእሻርክ ሰለስ ወሬሕ ሓለፍኮ። ዲብለ ናይ ሰለስ ወሬሕ ወቅት አትፋዘዖት ላኪን፡ ለራቅቡነ ዐለው ጅማዐት እግል ኢልተሀሙኒ ምን ቅያስ ወለዐል ዲብለ ልትሀየብ ሽቅል እሻርክ ለዐልኮ። ሐድር፡ እጽዕን፡ መኪነት ሐርክ …። ክምሰል ፍገሪቱ ህዬ፡ “እሊ ናይ ሽቅል አዳም ቱ፡ ለገብአት ዔብ አለቡ…፡” ቤለውኒ።
ዲብ ደንጎበ ንትሳረሕ እት ህሌነ ደሚን እግል ነአቅርብ ትሰአለውነ። አነ ላኪን ደሚን እግል አቅርብ ሔሌኒ። ወለቼ ወእሲቼ ምን ዐድ እንዴ አፍገርኮ ሳሕል ክምሰል ህለየ ዐድ እብ ግዲደ ተአምር ዐለት። ሰበት እሊ፡ እንዴ ሐጥረ እግል ልትድመነኒ ለቀድር ነፈር እግል እርከብ በክቼ ሰኒ ጸቢብ ክምሰል ዐለ ሰበት ፈሀምኮ፡
“አነ እግል ልድመኒኒ ለቀድር ለአምሩ ነፈር አለብዬ፡” እቤሎም።
“ከአደሐ እት ሸቄ ላሊ እፈርም”
“አነ ሰዋግ ሰበት አነ፡ ፍሩር እንዴ ወዐልኮ ዶልዶል እንዴ ይዐይር እግል እትመዬ እቀድር፡ ሰበት እሊ እግል ልሒለኒቱ፡” እቤሎምከ ሐል ሐግለው እዬ። አቡዬ ወአት እንዴ አዝበ ሰላዲ ክምሰል ነድአ እቼ ላኪን ሐል ረከብኮ። ዲብ ድዋራት ‘እንደ ለኻ’ ጸብሕ ዲብ ዐዝም ዐስር ርያል ዲብ ጂቦም እግል ኣቴ ክምሰል አምበትኮ፡ “ጊስ በገ ሽቄ” ቤለውኒ።
ሐቆ እለ አሕመዲን ዒሰ ለልትበሀል ዲብ መዋሰላት ምድር ለዐለ ሙዋጥን፡ ናይ በዲር ፋይላቼ እንዴ ፈተሸ ሓምሳይ መምርሕ ስዋገት ክምሰል ዐለ እዬ እንዴ አከደ ሰበት አጀደደ እዬ መኪነት እግል እጽበጥ አምበትኮ። እንዴ አምነ መኪነቱ እግል ለሀበኒ ለቀድር ነፈር ሰበት ኢረከቦ ላኪን ሙሳዕድ እንዴ ገብአኮ ሽቅል አምበትኮ።
ለራቅቡኒ ዐለው እግል እጀርብ ህዬ፡ ናይ ሰልፍ ሰፈር አስክ ዐዲ ግራት እንዴ በጽሐኮ ሐቆ ክልኤ ሳምን አቅበልኮ። ሐቆሁመ ዲብ መቀሌ ወሬሕ እንዴ ወዴኮ አቅበልኮ። “ከንቮል (ኮለንየ) አደገ” ዲብ እብል ወአትመሳምስ ክምሰለ ክልዶል እወድየ ሐረብኩዎም ወሰላዲመ አጭቀምኩዎም። ክምሰል ለአምኑኒ ሐቆለ አከድኮ አስክ አዲስ አበበ ግስኮ።
ዲብለ መደት ለሀ እምበል ታሴረት አዲስ አበበ እግል ትእቴ ልትቀደር ሰበት ይዐለ። ምስለ አምሮም ሰብ መካይን ሽሕነት ኣይታንቲ (ሙሳዕድ) እንዴ ገብአኮ አስክ ሚለ - ወሎ - በጽሐኮ። ዲቡ እትለ ትመዬኮ እተ ላሊ ዘብጥ ትሰመዐ። “ወያኔ ገብእ ቶም” እንዴ እቤ እብ ሰእየት አተናሴኮ። ሰበቡ ወያኔ
ዲብ ገበይ ሳደፈውነ ምንገብእ፡ እብ ገበዮም እንዴ ወዴኮ አስክ ሜዳን እግል አቅብል እትሐለም ሰበት ዐልኮ። ለትሰመዐ ዘብጥ ላኪን፡ ዐሳክር ሕኩመት እት ኖስኖሶም እበ ከልቀው መሻክል ቱ ለዐለ።
ምን ሚለ አስክ ናዝሬት እግል ትእቴመ ለልትቀደር ይዐለ። እንዴ ሐጥረ ምስሉ ለነሰአኒ ሰዋግመ ኢረከብኮ። የማኔ ተኽለ - በዐል ሆቴል - እብ ገበይለ ምን መቀለ አስክ ሚለ ለኣተውኒ መልሂቼ ቴለልዬ ኣመረከ ምስል ከረ ዐንዶም ወድ ገብረኣብ አታሌኒ።
ዐንዶም፡ “በጋ ርመርክዮ (ትርለት) ለበ መኪነት እት ሰውግ ቢንቶ አዋሸ እግል ትትዐዴ ትቀድር ማሚ?” ቤሌኒ። አነ። መኪነት እት እሰውግ ለሐለፍኩዎ አድብር ከረ ብደሆ ወሸንኮሌት እንዴ ፈቀድኮ፡ “ምሽክለት አልበዬ” በለስኮ እግሉ።
መኪነት ዐንዶም ዲብ አርበዐ - አዋሽ እንዴ ይእበጽሕ - ሰበት ዐለት፡ አስክ ዲቡ ነአበጸሐ እብ ናይ ተስፋይ፡ መለሀይ ዐንዶም፡ ሪመርክዮ መቅደረቼ አከድኮ። ተስፋይ ጸቢጬ ክምሰል ረአ ሌጠ፡ እዬ እንዴ አምነ ዲብ ዐራት መኪነቱ ሰክበ። እግል ቢንቶ አዋሽመ ናይ ዐንዶም መኪነት እት እሰውግ እምበል ምሽክለት ተዐዴኩው። ዐንዶም ጅንስየት ሰበት ዐለት እሉ ክምሰል ኣይታንቲ እግል ልሕለፍ ምሽክለት ይዐለት እሉ።
አስክ ናዝሬት ባካት ሳዐት ሐምስ አልዐስር አቴነ። ዲብለ ሐዝየ አካን ክምሰል በጽሐኮ ደማነት ሰበት ወዴኮ ምን ዐንዶም እብ ሸፋግ ትሳረሐኮ። ሰንበት ዐባይ ሰበት ዐለ ላኪን፡ ለሐበረውኒቱ ጋራጅ ድቡእ ጸንሔኒ። እግለ ዋርድየት፡ “መአሰሰት ምስግነ ታደሰ እላተ?” ትሰአልኩዉ።
“አይወ” “እተየ ህለ?” “ዲብ ቤቱ፡”
“ቤቱ እተያተ?” “ኮንዶእ”
እግል ልስዴኒ ኢቀድረ። እምበል ብጣቀት ጅንስየት ዲብ ሆቴል እግል ትትመዬ ኢልትቀደር። ታሴረትመ ምንገብእ ለትጀደደት እግል ትግበእ በ። ዲብለ መዲነት ዲብ አንጎጌ ዎሮት እስን ሐጀ ካፍረ ለዋዲ ዲብ ለአዘቤ ድማን ወድገለብ ዲብ ልትገናቤ ለረኤኩው ለአምሩ ነፈር መስለ እቼ። ሰላም ክምሰል
ትበሀልነ እብ ሸፋግ ቀርቤኒ። አረቂ አስቴኩዎ። ምስል እንዴ ትገሴነ ክምሰል ትሃጀክነ ወያናይ እት እንቱ ጸንሐ።
“እለ አነ ሽቅል ወይን ተረግ እንዴ አበልነ ዲብ ተሻሸት ትፈረርኮ” ቤሌኒ። ናይ ልብነ ሕድ ክምሰል ሀብነ አናመ ምሽክለቼ ሓኬኮ እግሉ። ሽውየ ለሐስብ እንዴ ዐለ ህዬ፡ ሕቼ ህሌት እግልከ ምስለ ትመዬ። እግል ተአድፈዐኒ ክምተ ምነ ህግያሁ ፈሀምኮ።
“መምየዪ ሌጠ እርከብ እት ኢኮን ደፍዕ ላተ ላዝምቱ” እቤሉ። “ከላስ አስከ ንስአኒ እቤሉ።
ለቤት መጆብ ዲብ ከደንተ። ምድር ሰበት ጸልመተ፡ ለገበይ አስክለ አፍ ቤት ለብዕ ሰበት ተ እመን እት እንካይድ ቤት ሕቱ በጽሐነ። እግለ ወእግል መሳኒተ ምስል ካቲካላ እንዴ ጠለብኮ እግለን ሽውየ ተልሄነ። እግል ንስከብ እት ንትዳሌ ላኪን ሮንደ መጽአው።
“ዲብ እለ ዐድ ርኡይ ለኢለአምር ነፈር እትምዪት ህሌኪ?” ዲብ ልብሎ እግለ እሲት ልትሃገወ እት ህለው፡ ዲብ ሐንቴ ዐራት እንዴ አቴኮ አተንስዮም ዐልኮ። ምን ቅያስ ወለዐል ህዬ ደንገጽኮ። ህተ ላኪን ሰኒ እንዴ ወዴት ጠባይዖም ሰበት ተአምሩቱ መስለኒ ኢትሻቀለት እቦም።
“ ንዑ እተው ፈትሾ! እላተ ማሚ ለቤቼ?” ቴለቶም አርወሐተ ረቢ እንዴ ሀበት።
“ንጊስ ከላስ እንዴ ኢለአክዶ ለሐበረውነ፡” እንዴ ትበሀለው አቅበለው።
አትኒን እስቡሕ ለጋራጅ ክሱት ጸንሐ። እግል ምስግነ ታደሴመ ረከብኩዉ። እብ ናዩ መዓወነት ህዬ አስክ ቤት ተስፋይ ወድ ሑ አቡዬ በጽሐኮ።
ተስፋይ ሽቅሉ ምስል መዋሰላት ለልትጻበጥ እትገብእ፡ ምስል አንፋር ኢሰፓመ ምስንዮት ዐለ እሉ። ህቱ ክምሰል ሰዋግ፡ አነ ህዬ ክምሰል ሴድያይ (ኣይታንቲ) እንዴ ገብአነ እስክ ድሬደወ አተላሌነ። ዲብ ድሬደወ ታሴረቼ ክምሰል ጸበጥኮ ህዬ አስክ አዲስ አበበ እግል እቴ ቀደርኮ።
መሳኒት ተስፋይ ሐዳስ ሼልቶ መኪነት ክምሰል አጽበተውኒ፡ ዲብ አቃቂ ለትትበሀል አካን፡ ዘቡን መስነዕ ቆንዶ እንዴ ገብአኮ ሽቅል ሰኒ አምበትኮ። ምናተ እብ ደሚርዬ ስካብ ልትሰመዐኒ ይዐለ። ምን ልውሕድ እሲቼ ወአዋልጄ ክምሰልሁመ መልህያምዬ ዲብ ከደን እንዴ ሐደግኮ ሐያት ብዕደት ሓልፍ እት ህሌኮ ደሚርዬ ሰኪብ አበ።
ሐቆ ሰቡዕ ሰነት
አስቴር ወለቼ፡ ዲብ ሰነት 1991 ዲብ ሜዳን ሙደርሰት ዐለት። ኤረትርየ ክምሰል ተሐረረት ህዬ ለዘት ፈርሐተ እግል ተአዳውር ምስል መሻቂተ አስመረ አተው። ምስል መልሂተ አስክ ዓይለት ሙናድለት መልሀየተ እንዴ አተው ዲብ ልተልሀው አሰይደ አዝመረ - በዐለ ቤት - “እንቲ ህዬ እትለ መዲነት ለተአሞርም አቃርብ ብኪ ማሚ?” እንዴ ትቤ ትሰአለተ እግል አስቴር።
“ዐድ አቡዬ ይሕደጎ ለልትበሀሎ ዐለው እግልነ መስለኒ”
“ሄየእ! ይሕደጎ ምን? እሊ ሐሙዬ ገብእመ ኢኮን?” እብ ደአል ለአትብገሰተ ህግየ ዲብ መን ኣመረ እንዴ ተዐዴት ዲብ ናይ አማን ሰኣል ትብደለት።
“ኮንዶእ።”
አዝመረ እግል እሊ በሊስ እግል ተአክድ፡ ተለፎን እንዴ ረፍዐት አስክ ወለት ሐልቼ ኤርትራ ይሕደጎ አተሰለት።
ሐቆ ሰላም፡ “ስምዒ ኤርትራ፡ ገብረመስቀል ተኽለዝጊ አስቴር ለትትበሀል ወለት ቡ?” እብ ሸፋግ ዲብ ተሃናፍእ ትሰአለት።
“አይወ ቡ። ወሚቱ ደሐንኪቱ?”
“በሊ፡ እብ እዴሀ ወእግረ ጠበሽ ብህለት ህሌት እትለ ምስልዬ ህሌት።” ኤርትራ እብ ሸፋግ እንዴ ጌሰት፡ እንዴ ነስአተ ህዬ አስክ ቤተ አቅበለት እበ።
“አቡኪ ዲብ እለ ህለ። እብ ሸፋግ እምኪ አምጽእየ እግል ትትዋጀህ ምስሉ፡ ” ቴለተ ቤተ ክምሰል በጽሐት። አስቴር ይአምነት። ሰበቡ ሻሹ፡ ብእሼ ዲብ መደውሻሽ ውቃው እዝ ክምሰል አስተሽህደኮ ረስሚ ሕቡረ ዐለ። ሰበት እሊ ውላጄመ እብ ክምሰልሁ ቶም ለአምሮ ለዐለው።
ሐቆ ከም መክሐደ ላኪን አስቴር እመ እግል ተአምጽእ ባጽዕ ትከሬት። ሙናድሊን አስመረ እግል ልእተው ዲብለ ወደዉ ሐርብ፡ ናይለ ትሓከረው ልባስ እግል ትሕጸብ ወሙጀርሒን እግል ትራዔ እማት መዐስከር ሰለሙነ ዲብ ባጽዕ ዐለየ። አስቴር ዲብለ ትከሬት እቱ ወክድ ላኪን ማርቼድስ እንዴ ትጸዐነየ አስክ ሳሕል እቅቡላት ዐለየ። ህታመ ደርበ አስክ ሳሕል አቅበለት።
ሐቆ ገሌ ወቅት አምዕል ሐቴ አስቴር፡ እመ ወሕተ እንዴ ጸብጠት አስመረ እት ቤት ኤርትረ ዲብለ አተየ እቱ ወክድ፡ አነ ህዬ ምን አዲስ አበበ እንዴ መጽአኮ አስመረ እንዴ አቴኮ፡ አስክለ ቤት ገጬ አሳድር ዐልኮ። እብ ሕርየት
ኤርትርየ ፈርሐት ታመት ግልብብቼ እት እንተ፡ ዲብለ ቤት አቴኮ። ገጽ ሻሹ፡ አስቴር ወፍትሒ ክምሰል ረኤኮ፡ “ያ ረቢ! ምን አዜ ወሐር ሚ ኢወዴከ እዬ እግል ኢበለከ!” እንዴ እቤ እብ ልብዬ ረቢዬ ሐመድኮ ወሸከርኮ። ሰበቡ ህዬ ዲብ አውጌት ምን አፍ ከይስ እግል እፍገር፡ ውሳፍ ኬር ለገብአ እዬ ጥርሶ ክምሰል መድሕናይ ኬር እት እንቱ ለአከዩ እቼ። ለምስል ሸዐብዬ ተምኔኩወ ሕርየት እግል እርኤመ ቀደርኮ። ዲብ ደንጎበ ህዬ ምስል ወላጄ ወበዐል ቤቼ አመሐበርኮሽ።